مابحلمشى
....
وأبلة سعاد
بتاعة الرسم فى الحصة
وتيل نادية اللي لابسانى
وحرف الشنطة بيعانى-شروخ وجروح-
ويفضل صوتها فى ودانى
بتطلب رسمة على الحيطة
وكل الفصل بيحاول
عشان يرسم
حكاية بنت ومسافرة لجدتها
وشايلة فى ايدها سلتها
وحبة فاكهة واخداها فى ضحكتها
وتملا الغابة فرحتها
وعَقدة ضفيرة كالمدنى
على طهر الجسد والروح
ومش سامعة لصوت الذئب لو يعوي
ولا تنعي هموم الحاجة للعيشة
مادام الشجرة ويَّاها
بتوهبها كل لحظة حياة
فادور وسط ألوانى على لون الشجر الاخضر فملقاشى
أقول: ماشى
بلاش نرسم هنا شجرة
لحد اما استلف أحلام
يا أهل الفصل دلوني
مافيش ألوان ؟!
يجاوبنى ضجيج الصوت لطيارة
بتقتل فينا أحلامنا
ومن يومها مابحلمشى
...
أشعار
عادل عبد الموجود