ذكريات 2008
مريم 2022
...
ولا مسها .. أبدا بشر. . أبدا بشر
ولا حسها.. إلا وريد الحب داخل كفتى
ولا هز موجها.. إلا رجفة دفـتى
ولا قال لها ..أشعار فى صمت الليل بشوق
إلا كيانى اللى بتسكن فيه .. ورعشة شفتى
من بعد ما داسها القدر
ولا مسها أبدا بشر .. أبدا بشر
ولا حسها .. إلا دراعى اللى انتنى
بالحزن فى زمن الرضوخ
ولا جسها أبدا شيوخ ..ولا أوليا
ولا لحظه تاهت بين حنين الأغنيه
ولا داقت الرعشه الحلال .. ولا عاشت الرجفه الحرام
ولا حتى كان بينها وبين الناس كلام
كان بين دموع روحها سهام
وآلام .. ما يتحملها ( ناسك ) فى الخلا
كانت آهاتها الخضره .. تشبه للصلا
ولا مسها أبدا .. ولا
والسلسله .. على صدرها ..
كانت بتخنق روحها .. زى السلسله
ومغربه .. ومشرقه .. ومقبله
هى النبيّه .. الجايّه فى توب الحلال .. والبسمله
ولا .. ولا .. ولا .. ولا .. نامت لديب أخرس كسيح
ولا..ولا.. ولا..ولا .. نامت فى فرش يكون مريح
كانت بتحضن قلبها البكر الجريح ..
وتتوه إذا تاه الجسد
ريش الحمامه ..قصقصٌه ناب الأسد
وبيحسدوها ع الهزيمه .. والحسد ..
خنجر بيطعن فيها من كل اتجاه
ضاقت على الروح الحياه
خنقتها فى صهد الزحام .. إيد القدر
ولامسها أبد بشر .. أبدا بشر .. إلا أنا
إلا شراعى اللى انتنى .. م الليل .. ومن خيل التعب
لما فى لحظة توهه هجرت ولفها
دخلت فى دايرة ابو لهب
فسحبها جوه عيون قزاز متحرمه
دخلها جوه الأرض .. أقنعها بأن الطين سما
وحبسها فى الدبله اللى جوه كفته
دنس عصيرها بشفته
لكنها .. قدرت تدوسه بالشموخ
ولا مسها أبد شيوخ
ولا هز بابها .. غير رغيف معجون قلق
كان قلبها .. فى كل ليله بينفلق .. وتتوه .. تتوه
ما تشوفش إلا الحُسن فى كل الوجوه
يعلى الصراخ جواها .. لكن تكتمه
إبليس لبس نضاره سوده .. وهى واقفه تكلمه
حاول يصيبها بجرح من تحت الحزام
ولا داقت الرعشه الحلال ..
ولا عاشت الرجفه الحرام
واتبح صوتها م الندا
زهره .. بتتهجى الندى
طفله .. بتستنى الحبيب المنتظر
أوقات تخونها السكه .. ويخونها النظر
وساعات تنام .. تحت اللحاف .. من غير غطا
والسيرياليه .. تدوس عليها .. تجزها
واللى لبس دور الحبيب بيغزها
بالسيف فى قاع الجمجمه
دخلها جوه الأرض .. أقنعها بأن الطين سما
وحدفها للغربان .. ولكن نبضها
أصبح حصان مطلوق لساقية أرضها
واما الطريق الأفعوانى عضها
جِرْيِتْ عليّ بدون حلق .. سبحانه هو اللى خلق
لمعة عنيها طهرت .. قلب الشيوخ ويا القسس
وجسدها.. قال الرب
( عمرك يوم .. لغير شيخك ما تقدر تتلمس
روحك هاِتدخل رحمتى
داخل بيوت ملكوتى بس .. هاتتحبس)
لمعة عنيها طهرت .. قلب الشيوخ ويا القسس
وجسدها .. لو هايفور على الصلصال
هايصبح روح فى ميت مليون جسد
ريش الحمامه .. قصقصْه ناب الأسد
يا عنفوان الصرخه .. فى مقاومة تعالب مبهمه
يا ملهمه .. حتى لقلب الأغبيّا
ياالله اطلعى.. لمصاف جميع الأوليا
وعلى الطريق.. مايغركيش أبدا ضريح
إتدارى فى القلب الجريح
من كل ديك منفوش.. فصيح
واتعلمى .. كونى الشهيق .. ويا الزفير
تفكير عميق بالقلب .. قبل ماتبتدى تتكلمى
الناس مراقبه شفتك .. كل التعالب عرفتك
رسموا حجاره.. ونار مراره .. ف دفـتك
و استنوا ليلة زفـتك ويايا .. لاجل ما يخطفوكى مكممه
يا عنفوان الصرخـه فى مقاومة تعالب مبهمه
إنتى صبحتى محرمه .. ع الكل إلا ضمتى
يا وطن ..حضن قلبى الدبيح ..يا أمتى .. يا أمتى
يا ضنايا ..لو يرجعلى بعد سنين عجاف
يا غطايا .. لو هاحتاج لحاف
يا لقمه حاف .. فى معدتى
ماتغركيش الزحمه جوه قعدتى
أنا قلب راحل.. للسواحل .. والسواحل كلها متلغمه
والصحبه طال بيها العمى
وانتى مازلتى الطفله لابسه المريله
وانتى النبيّه الجايّه.. في توب الحلال .. والبسمله
ولا .. ولا .. ولا .. ولا .. مسك بشر مسك بشر
بس انتى مش فاهمه الحذر
طفله بتستنى الحبيب المنتظر
وأنا الحبيب .. أوقات أجيب الشوك فى جيبى اللى انقطع
وساعات اجيب ليكى الجذر
وساعات أتوه فى الضلمه .. وارجعلك عيونى مضببه
وساعات أعود بالمركبه .. من غير سمك
دايما يخون قلبى الشبك
قلبى اللى بالحب اتشبك
وشبك راياته على سطوحك من زمن
مش لاقى غير صدرك وطن
يا حكايه .. بعد حكايه .. فى الصمت اللعين
يا بهيه .. خارجه بهيه .. للقلب الياسين
يا صحبة الياسمين .. بتحضن كفتى
قومى استهجى دفتى .. هاخدك لعالم فزدقى
على كل سنتى فى الخريطه تشرقى
وتفرقى ..نسمة عبيرك ع الجهات
يا الله احضنينى من سكات .. واتبسمى
يا الله علىّ اتقسمى .. يا قوس قزح .. يا ألف لون
يا الله اسبحى فى الكون عشان .. الدنيا تشبع بالرزاز
مات العزاز يا حبيبتى .. كان فى الكون عزاز
كل العيون صبحت قزاز .. إلا عنيكى الملهمه
ألماظ بيتحدى الغزاه
الله عليكى وانتى راضيه بالحياه
الله عليكى وانتى بوصله .. لو ضمير الحب تاه
الله عليكى وانتى فى زمن الحُفاه
لابسه هدوم العفه .. شامخه بالإله
رغم الحصان اللى انكسر.. والزلزله
ولا .. ولا .. ولا .. ولا .. مسك بشر .. مسك بشر
...
أشعار
إبراهيم رضوان
https://www.facebook.com/profile.php?id=100008189626421&mibextid=ZbWKwL