برغم الهم و الأحزان
بألش يا زمن واضحك
و رغم المر شاربه كيزان
و قلبي للوجع خزان
راح افضل يا زمن أضحك
يا حزن برغم أوجاعي
و تغريبي بدون داعي
راح افضل أجري وأناطحك
ولما أدوس على راسك
و بين عيلتك و حراسك
هاروح بين البلاد فاضحك
و تصرخ فيا سيب وانا اسيب
و مهما تنزِّل المناسيب
و تدبحني بفقد حبيب
و ترمح ف الخلا بشطحك
تنزل فوقي من بلاويك
يقوم صبري عليك يشويك
ولا تلاقي بلد تتاويك
وأقيم فرحي على سطحك
و مهما تجرني للموت
تلاقيني عليك قادر
واقابل ده الوجع بسكوت
ومش معنى ان انا صابر
تقوم تضغط على جرحي
واقولك دوس كمان واضغط
ده مهما تفتري ف قرحي
هترحل من هنا و تسقط
ومش طالع عليك بكرة
ومش هتبان لي في الذكرى
على شريطي ما بان نضحك
و تنصحني بإني ألين
ولا أسمع في يوم نصحك
صحابي بشعري متفائلين
ده أكبر مستحيل أرضخ
و بأسي من زمن صارحك
ما بين كوخي و بين صرحك
ييجي مليون و ميت فرسخ
روح اسأل دي الهموم عني
ولا آه واحدة نالوا مني
و همتي فيها ما بتسألش
و تتقل بيا ما نتقلش
و كلمة يأس ما تتقألش
أذلك بابتسامة و ألش
وأنشر بسمتي و اضحك
...
أشعار
محمود عبد الجوَّاد