اسكندريه
...
شوف م الدور التاني
قبل ما يعلا السور
دا مافيش شوف مجانى
للبحر المقبور
و اقرا عليه الفاتحه
أو طمنا عليه
اصل الموجه الرايحه
طفوا عليها النور
.....
الله يرحم بحرك
وقت ما كان للشعب
و جمالك أو سحرك
كان تمارين ع الحب
و الموجه اما تجينا
نرمى عليها همومنا
لكن باعوا ماضينا
ويا الضحكه الكدب
و مافيش شوف مجانى
للمنقوع ف الغلب
......
ليه بنعيشك ذكرى
حلوه يادوب ف البال ؟
و مافيش احلام بكره
طول ما هواكى خيال
و زمان كنتى عروسه
من ايام الثانوى
واعده الشط ب بوسه
بس الحلم محال
و لا م الدور التانى
برضه النظره حلال
......
عاطف عبد الحميد