برواز فاضي
_____
مادام قابله اني كنت عزيز
فقدامك على البروايز
قميص يوسف
تردي بصيرة العميان
تردي من الحصى الحنطه
وتتديني سنابل قمح من الشنطه
لا انا طالب سجود ليا ولا معروف
ماانا من يومي شهم ف شدتك واقف
ولا طالب دينار من صك غفرانك
ولا قابل اعيش درويش
انا بس اللي جوايا شوية ذكريات وجعاني
من أول (دخولي البير )
ومن اول خواتي ما قالوا تاه في السكه واتغمى
(فأكله الديب)
انا اللي رميتي اوجاعي في ركن الهامش المجهول
ياريتك لما احب اقول
خسارة ماتخسريش( دمعه)
انا اللي فحتّ من روحي الهوى شمعه
وشقيتلك في( قلب البحر ) ع الدنيا الجديده نجاه
وانا اللي تعبتلك وحدي
ومش وحدي اللي عايش فيكي عالضفه
أنا من كنت فى اللفه وأنا حاضر
فليه رافضه إني كنت عزيز
وليه قدامك البراويز بدون صوره لأمجادي
انا اللي طريقي كان ف الشوك
وقلبي في سكتك حافي
وانا اللي أكلتي من لحمي
وحملتك على كتافي
وأنا الواد اللي من حبه طلع أول
فهاتي الحب م الأول عشان أحيا
دا انا من صغري اقول (تحيا ) ولا بتحياش
وقالو الجاي اكيد أحلى وظالمينه ولسه مجاش
يامجد بعده من قبل ( الملك مينا اللي قالوا موحد القطرين)
انا جايلك لكن تايه فدليني اروح على فين
أروح للي إشتروكي (بربع ساغ ) في السوق
أو أستناكي لما تكملي عمري
عشان بالجمله يتباع لك
ومييييين باع لك رصيفي وعشت فيكي سجين
يامحفوره في (حباب العين )
بدون (نكله وتعريفه)
بحط عيوني تشريفه قصاد علمك
واقول ( يابهيه ) مين ظلمك
وياما نغزني عكازك على ضهري اللي طاب ونجيت
عموما قلبي مش (عواد )
ولا طبعك (علي بابا)
مسير الحي بيعدي لطريق الصعب
(يامسرور)
جنابك (شهريار ) لكن هتاخدك (شهرزاد )للنور
وتحكيلك حكاية ( ألف ليله وليل)
وتبنيلك عيون ع النيل
حواري لك وعشاقك فانا لو كنت بشتاقك
قصيدة
بتنزيلي لي ديوان
ولو رافضة إني كنت (عزيز )
أنا راح اغير البراويز
واقول تاهت صورتها ولسه موجوده
...
بقلم
( احمد هلال )