كوبري لـ اقصي جنوووووب الحب.
...
طرف الكباري مَطلع بيرمينا
حدف لطريق ومظنّة المشاوير
بنمد خطوة نتشّد..بالعافية
وانا مَشيْتي حافية ..
مطرح ما اخطّي سندس وسال اخضر
حسينية م الأزهر ..طرح الاصول والخير
سيبك من السكة ..لو ضلمة مش واضحة
قطع الطريق بقي مهنة البطّال
والقيل وقال..قتّال.. له أصل و رواية
الكوبري عالي عليهم ..والحمد جوايا
لمّيت خيوط قبلك وطِلعت خسرانة
ضيّعت وقت كتير ..علي سكة مقطوعة
كل الحارات ..متاهات والرجعة موجوعة
واتبح صوتي عشان يفهموا الليلة
راكن يا حرف.. ومرصدك آمن
كامن في جوف فكرة شبه لوني
لو حاصروا فيك المعني ..عطّشهم
اقطع حبالهم جوه بئرك ..فوق
واشنق سكاتك ..وابتسم واضحك
انت اللي بان اوّلك ..خيبان
هاوي كما القُدما.. عشق الانتيكات
وحكاية مالهاش اصل بس بتحبها
تجمع في درجك ..
حبة ولُاعات واقلام وعيّنات من بشر طواغيت
وكأن دول طلعت بيهم م الحياة
طب لقمة العيش اللي نشفت جوه قلبك
قسمتها مع مين في كل اللي اتنسوا؟
طلّعت روح كام حد من جوه الكتب ؟
وناقشت فيهم .. بمنتهي الروقان ؟
زحمت ليه الركن اللي باقي فاضي فيك ؟
وبتشتهيك ليه المتاهة تلّفها؟
طرف الكباري ماكانش بيعديك
كان يادوب زي الخيال يحدفك
علي ظهر حواديتك ويختم بالصلاة
يا قتيلة الاسئلة.. وقاتلة بالاجابات
يا مُر بات حاضن بكايا ودمعتي
وخوف بيلقف نفْسُه لو بِنت له
سرسوب قلق ورضعته م الازمات
غاية ما اصبح وحش مابيرحمش
انا اللي عشت مفتّحة عيوني
جوّه منامها ..بس ما بتسمعش
علي الله انا ..وحكايتي ..ورفاقة
وسط ضِيقهم بيعرفوا يطبطبوا
الكل بعدوا وبس دول قرّبوا
فلضمتهم حبّات ياقوت وعقيق
وباركت بيهم روحي في السكة
وقطفت عناقيد الغُنا .. وغنّيت
وعفقت صوتي ساعة امّا انجليت
وكل اللي طلعوا فـ لحني..
حقيقي طلعوا نشاز
نُص الكلام مبتور بفعل الهوي
والدمع طلّع همّه فـ الاحساس
كل اللي حسيته..
ان الغُنا سِمعني وبرضو ما فهمنيش
محتاجة كوبري لـ أقصي جنوب الحب
ومحتاجة قلب ..زيي نِفسُه يعيش.
.......
أشعار
عفاف التركي
https://www.facebook.com/profile.php?id=100008644776225&mibextid=ZbWKwL