خلاص قضيت الفرض
وبلغت الأمل؟
ياهمسة فوَّارة بعسل
عَيٍل عيونك منقدين...
في مقاعد الشتوية وعجينة وداد
من ضحكة الشعر المقطَّر م الشروق
للشعبطة في ضلوع صديق
ولحد ما تهلل كراسي القهوة
واحنا بنتفرش فوق الرصيف
وينفرط في قلوبنا بوحك
كُنت بتطهَّر صباحك م العِلل
وتداوي عيبه
واما طالبك بالوصال
صُعُب عليك تكسف طبيعته
اديته روحك
من زمان لَمٍيت جروحك
ودفنتها ف بطن الليالي... لتفضحك
شوف بقي مين اللي هيراقبك
ويكشف مخبأك
مين اللي هيقطَّر روايحك
والهوا اللي صرفته بالمعروف من الرئتين
ويعِد احلامك
ويُرصُد نيٍتَك
هتسيبنا حطبة في الحريق؟
ما احنا كُنا ع الطريق
فيه ألف مشوار ماابتدوش
لسه غول الهَم بيحرضنا نفرد فَرشِتُه فوق البيوت
لسه الحواري مسلٍمَة رقابيها لاسنان الحُفَر
كُنت انتظر
يعني كان لازم تفوت قبلينا
قبل مانتفق...
مين فينا ينفع للسَفَر؟
...
أشعار
الشاعر القدير
محمد مطر
