سِفر النبوءة
اوعاك تبيع حرفك ولو خلوك…….أخير
مهما تكون في الخلف
حلق فوق كتاف الريح وطير.
علِّمْ نسور الجو
أول فصل في كتاب الأمل.
وان الخيول
يقدر يروضها كلام ابن الأجير..
اعلن: امير الزيف خلاص ..
مبقاش امير
لا تنحني قدام مسوخ المصلحة
ولا تبقى سجادة تبوس ايد الجِزم
البون كبير
ما بين نيام الأضرحة
وما بين عيال
فطموها من لبن الغنم
شعرك سفينك للخلاص
فاجمع يا نوح م المعنى جوز
من طير خيالك
من جِمال الصبر في أرض الضلال
وادعي
ولو مليون سنة
كل اللي قالوا الشعر سهل ولا يجوز
واطرح سنابل يوسفية
بعد سنوات العجاف
وارسم تفاصيل الكمال.
من جوا ضلمة قلبهم
اخلق لهم نطفة تباشير الهلال
يا باب ……..!
فتحت لناس كتير متزوقين
عرفوا بروعة
ياكلوا عقل الناس منين
فلاح وجاي
ايدي الشراقي فيها ألف سبيل
طيني اللي ماشي مابين خداعكم
فيه ميلاد النيل
وكتير لوحدي
بغني لضفاف الأمل تراتيل
خليك يا ضهري
ساند الأيام وإجمد
لك يوم مصيره اقوى كتير
من كهنة المعبد
يوم فيه يزول العنكبوت
بخيوطهم السودة
تكتب بدمك فوق جدار الشعر:
ملعون ادين خلت ببان الشعر مسدودة
ومفيش كرسي لقطر محجوزه ودا لمسعد
وان النبوءة الكل في المشهد
انا لما اقول الشعر عاميه في حضرة قطب
عشان خناجر م الجيوب بانت بتعلن حرب
واتجمعوا الفين قبيلة والزمان الصعب
واقف وبرمي بكل شوقي للنجوم الهِلب
وثابت وصامد بس غير كتير ورا ماتوا بداء الغُلب
فوق كوبري طلخا ببص للنيل الحزين واسأل عيوني: إزاي
ينباع صواع الشعر في عزومة وحبة شاي
ووسية الحرف اللي كم نادت خيول أبضاي
نداه قالت يا ولد زمنك مسيره جاي
جاي المدينة في جيبي شعري وغيره شعري مفيش
يا عجوز لا ينفع مال ولا واسطه مع الدراويش
احنا اللي بايعنا الجمال في لمة الحرفيش
لا نبع حرفنا بالعزومة الهاي
وننام عشانا الهم وكسره عيش
فاضل لي ايه بعد النهابه لما لمُّوا القمح
والليل عويل عمَّال بينغز في جنابي الجرح
وكل موسم للحصاد يقتل في قلبي الطرح
ولحد امته الديب جبان واقف ليوم الدبح
اهتف محال الشعر يبقى مطاطي للعوجان
واللي ورا ستارة وبيحرك عرايسهم مسيره يبان
لا شر دايم في الحياة ولا دايم الشِّلة
الموت كتاب يقطع حبال الوهم والتوهان
يا قافيه كتمه الخوف في بق الكل خايفه من عصا الناجي
عمَّال بيختار اللي يشبه له واللي ما يشبهله أكيد من الكره موش ناجي
أنا جيت بطين الأرض وفي ايدي الحياة خضرة
لا جمعكم بيتي ولا شكلكم شكلي ولا كنت يوم عاجي
أنا موش هداهن لجل إيد تمدني لخطوة
ولا عمري رحت لبلطجي واقف اشخلل وفي اديه مطوه
الشعر وحي وغار نبوءة ومعجزة وتنزيل
الشعر أطهر من لمامه ومشتاقين سطوه
الشعر موش قعدة ببرفان سندسي
ولا عمره كان نزوه
الشعر طول عمره كفاح غزوة ورا غزوة
لا في يوم هطاطي للجبان ولا اكون من المحاسيب
ولا يمسكوا زله عليا وعُرف: سيب وانا اسيب
هافضل اقول الشعر بين الضحكة والكراكيب
وكم نبي حمل الرسا وكان في أهله غريب………
...
أشعار
الشاعر إبراهيم حسان
https://www.facebook.com/profile.php?id=100012523905112&mibextid=ZbWKwL