قَصائد في حب فتحي البريشي
…
1
المرحوم
فتحي البريشي
…
و مين يقدر في يوم ينساك..
و لا موتك يفرقنا
كأنك كنت أحلي ملاك..
ف ليه يا فتحي تسبقنا
ما كانشي ليا غير قلبك..
يدفيني..و يحضنني
دا عمري ها دفنه جنبك..
لحد الليل ما يدفنني
حبيب..و الكل بيحبك..
و ليه موتك خدك مني
يا فتحي بريشي..ما أغلاك..
محيط الحزن..غرقنا
...
2
فتحي البريشي
...
راجع و دموع حاضنه في رمشي.. من دفن شقيق.. كان ويانا غمض في عنيه..بس ما قامشي.. و وجع في قلوبنا القلقانه يا فتحي..و نفسيا..سارح.. مش حاسس أبدا بالراحه كل الأيام.. زي امبارح.. ماسكه السكاكين لينا صراحه فرع الأشجان..بعدك طارح.. و لا نجمه بتبرق في الساحه مين اللي عليه الدور يمشي ندفنه في الأرض العطشانه
...
3
فتحي البريشي
رحمة الله عليه
...
سافرت للمنان يا فتحي..في يوم حزين..
و تركت لينا وجع..و دمعه في العيون
بعد الوداع يا حبيبي..كان بدء الأنين..
يا اللي انت كنت..في خط سيرك كن..تكون
مات ليا ست اخوات..و سابعهم خلاص..
ودعنا فجأه..بدون ما حتي يقول لنا
في الشعر كنت البيت..و عمدان الأساس..
في الحب كنت البوصله..لاجل تدلنا
الناس هنا يا فتحي..ٱه ما عادتشي ناس..
و الخوف من المجهول..رياح بتشلنا
إحنا ها نلقي فتحي تاني..يا دنيا فين..
يا اللي انت سايب شعر..بيهز السكون
...
4
مهداه إلي ملاكي الذي مات
فتحي البريشي
...
مش عارف ليه.. بيدق الموت..
دايما علي بابنا الأيام دي
وقفت غربان.. علي فرع التوت..
بتدوس عصافير حلمي الوردي
و جنازه.. بتحضن في جنازه..
و اخوات بتعوم في بحور نسيان
مراجيح الموت الهزازه..
منصوبه لفتحي في كل مكان
بتنقي الصافي بفرازه..
و تسيب الباقي في بير أحزان
يوصلنا ساعات أسرع م الصوت..
يا جماعه..يا إما يكون فردي
...
5
البريشي
فتحي..و سطحي خلاص..هايفضي م الديوك..
و هاجيب منين الصبر..يتحمل رحيل
شاعر و تاجك شعر ..يتحدي الملوك..
صابر يا فتحي الحب ع السفر الطويل
مين اللي زيك..جوه مصر المغرمه..
مين اللي يقدر تاني يقعد مطرحك
بصيت و شفتك..طير إلهي في السما..
و لقاك برب الكون يا فتحي مفرحك
كنا معاك قاعدين يا فتحي..إنما..
ودعت روحنا..بس سايب ملمحك
مليون ملاك يا حبيبي..للرحمن شالوك..
يا صاحب القلب المقدس..و الأصيل
...
6
...
فتحي فتحي
فتحي البريشي
...
دا ينطبق عليك..
بأن الموت بيخطف
يا فتحي بريق عنيك..
لسه في الروح بيعزف
يا سيد كل شاعر..
في مصر مهما كان
إنسان مليان مشاعر..
بيوسع المكان
فيه بيننا ألف داعر..
بينجسوا المكان
يا فتحي..روحي فيك..
و القلب ما زال بينزف
...
7
...
فتحي
واخد علي خاطري منك..
يا فتحي..علشان مشيت
ازاي ها ستغني عنك..
و انت اللي ليا بيت
حاضن كل الغلابه..
باصص علي بكره جدا
كاره شعر الديابه..
عاشق في ديك بيدن
فارقت الدنيا يا ابه..
و روحت لدنيا أحسن
صوتك موجود كأنك..
أشعار علي كل حيط
...
وكان للشاعر الكبير إبراهيم رضوان هذه القصيدة وهذه الكلمات قبل وفاة الشاعر بأيام
لا أظن أنني أحببت شخصا كما أحببت حبيبي فتحي البريشي..و لا أظن أن هناك من أحبني بنفس درجة فتحي البريشي..هذا الملاك الطاهر سقط أمس في مقر اتحاد الكتاب بالمنصوره..نقلته الدكتوره سميه عوده إلي المستشغي..و ظلت معه حتي دخوله العنايه المركزه بعد أن هاجمه نزيف المخ..فتحي البريشي الٱن بين يدي الله..و نحن لا نملك إلا الدعاء له أن يعود لنا سالما حتي تعود الروح لنا..و أنا لا أملك إلا أن أهديه هذه السداسيه
فتحي البريشي
يا نن عين قلبي اللي حبك من زمن..
يا فتحي يا بريشي اللي ساكن قلبنا
من قد إيه و انت الوطن داخل وطن..
و انت اللي ساجد جوه مسجد حبنا
ليه يا حبيب القلب تبعد أو تغيب..
أو تتعب الناس اللي جنبك بالمرض
خليك معانا دا الأدب فيه ألف ديب..
و كتير من الأسماء علينا بتنفرض
عايش ما بيننا حبيب لميت مليون حبيب..
و لا لحظه كانلك م الوسط أبدا غرض
عمرك يا فتحي ما خدت يوم أبدا تمن..
و لا كنت غير شجرة كافور من ربنا
…
كلمات
الشاعر الكبير
إبراهيم رضوان
https://www.facebook.com/profile.php?id=100008189626421
قصيدة
واحد .. ومات
للشاعر الكبير
إبراهيم رضوان