لما كلب يموت طبيعي
...
لما كلب يموت طبيعي
.... يمشي خلفه كلاب كتير
،،
اللي يحلف بيه وبامه
.... واللي يدعيله بضمير
،،
المهم الصوت يلعلع
.... كان نباح أو كان جعير
،،
يدعي كلب بعيد في سره
.... نسمعه ف عز الشخير
،،
كان أمير ويا رب يدخل
.... جنه مطهيه وحرير
،،
فيها فزدق لوز... ولُزدق
.... أو حتت لحمه وعصير
،،
يا سلام... ميت في ليله
.... طاهره مغسولة الحصير
،،
كلب مات وطبيعي يحزن
.... كل كلب نباحه غير
،،
كلب مات من غير مناسبه
.... قام حمار كبّ الشعير
خلى واحد ماشي ساكت
.... يسأل الطير ع السرير
،،
بيركم المليان شكاوي
.... يروي واللا ما عادش بير
،،
سير عليه الخلق سايره
.... واللي صار محطوط في زير
،،
خير كبير وجناح مرفرف
.... ع المزفلط والفقير
،،
الفرزدق مش مهيأ
.... من نمير يشتم جرير
،،
كلب عدى عليك فدلدق
.... بغل سرحان عبّصير
،،
كلب مات من غير مناسبه
.... قام حمار كبّ الشعير
،،
خلى واحد ماشي ساكت
.... يسأل الطير ع السرير
،،
لو فطير العمده فَحّم
.... يبقى إيه دخل الحمير؟
...
أشعار
سعيد شحاتة